Imran 
اردو ورلڈ کینیڈا ( ویب نیوز ) نیٹو کا 3 روزہ سربراہی اجلاس آج سے واشنگٹن میں شروع ہو گیا۔امریکی صدر جو بائیڈن کی میزبانی میں ہونے والے اجلاس میں برطانوی وزیر اعظم کیئر سٹارمر، فرانسیسی صدر ایمینوئل میکرون، نیٹو کے سیکرٹری جنرل سٹولٹن برگ سمیت اہم رہنماؤں نے شرکت کی۔فوجی اتحاد کی 75 ویں سالگرہ کے موقع پر ہونے والے اجلاس میں یوکرین کی جنگ پر توجہ مرکوز کی جا رہی ہے، جس میں رکن ممالک کی جانب سے اگلے سال تک یوکرین کے لیے 43 بلین ڈالر کی اضافی امداد کا اعلان متوقع ہے۔
خبر رساں اداروں کے مطابق ملاقات میں ایشیا اور بحرالکاہل میں چین کے بڑھتے ہوئے اثر و رسوخ پر بھی بات چیت کا امکان ہے۔یاد رہے کہ نیٹو کا قیام 1949 میں سرد جنگ کے دوران سابق سوویت یونین کے خلاف کیا گیا تھا، 12 ممالک پر مشتمل یہ اتحاد اب 32 ممالک تک پھیل چکا ہے۔اجلاس میں نئے رکن سویڈن کے سربراہ پہلی بار شریک ہیں، روس کی مخالفت کے باوجود یوکرین بھی نیٹو کی رکنیت کا خواہشمند ہے۔
