اردو ورلڈ کینیڈا ( ویب نیوز ) مسلم لیگ (ن) نے آئندہ انتخابات میں پنجاب کے ہر حلقے سے اپنا امیدوار لانے کا اعلان کر دیا۔ رانا ثناء اللہ نے کہا ہے کہ مسلم لیگ ن آج سے انتخابی سرگرمیاں شروع کرے گی۔
وزیر داخلہ کا کہنا تھا کہ ہمارا عزم ہے کہ پاکستان مسلم لیگ (ن) پنجاب میں انتخابی عمل کو بھرپور طریقے سے آگے بڑھائے گی، اس لیے مسلم لیگ (ن) تمام 297 صوبائی اور 146 قومی اسمبلی کے حلقوں میں اپنے امیدواروں کو نامزد کریگی
انہوں نے کہا کہ پہلے بھی ایسا ہوا ہے کہ بعض اضلاع میں ہم نے اپنے امیدواروں کو نامزد نہیں کیا لیکن اس بار ہم نے اسے چیلنج سمجھ کر قبول کیا ہے کیونکہ ہم نے پارٹی کو یوسی سطح تک منظم کیا ہے۔رانا ثناء اللہ نے کہا کہ اگر 12 اکتوبر کا ایڈونچر نہ ہوتا اور نواز شریف کو نہ ہٹایا جاتا تو آج ملک ترقی کی راہ پر گامزن ہوتا اور پاکستان میں بے روزگاری نہ ہوتی ۔ ایشین ٹائیگر اور ہم ایٹمی طاقت بننے جا رہے تھے۔ بعد میں نواز شریف کو اس وقت سزا ملی جب وہ معاشی طاقت بننے جا رہے تھے۔
جب بھی ملک بحران کا شکار ہوا نواز شریف نے ملک کو بحرانوں سے نکالا لیکن اس کے بعد ہر بار نواز شریف کو سزا دی گئی سیٹ ایڈجسٹمنٹ سے متعلق سوال پر ان کا کہنا تھا کہ ہم اپنے جیتنے والے اور مخلص امیدواروں پر کوئی سمجھوتہ نہیں کریں گے اور اگر کوئی ایسی صورت حال ہو کہ ہمیں بھی مدد کی ضرورت ہو تو سیٹ ایڈجسٹمنٹ کی بات ہو سکتی ہے۔
