اردوورلڈ کینیڈا ( ویب نیوز )اسلام آباد کی انسداد دہشت گردی عدالت نے دہشت گردی ایکٹ کے تحت درج 5 مقدمات میں پاکستان تحریک انصاف (پی ٹی آئی) کے چیئرمین کو مختلف تاریخوں پر طلبی کے نوٹس جاری کر دیئے۔
چیئرمین پی ٹی آئی کے خلاف دہشت گردی ایکٹ کے تحت درج 5 مقدمات کی سماعت ہوئی، چیئرمین پی ٹی آئی کے وکلا جان محمد، سردار بھوجی اور نعیم پنجوٹھا عدالت میں پیش ہوئے۔

وکیل صفائی جان محمد نے عدالت کو بتایا کہ پی ٹی آئی چیئرمین کو روزانہ جیل سے عدالت لانا آسان نہیں ہے۔
جج ابوالحسنات نے کہا کہ میں جانتا ہوں کہ جیل سے روزانہ لانا مناسب نہیں، مقدمات میں ملزمان کی حاضری کو بھی نشان زد کیا جائے۔
وکیل صفائی جان محمد نے استدعا کی کہ پانچوں مقدمات کی مختلف تاریخیں رکھنے کے بجائے ایک تاریخ رکھیں۔
جج ابوالحسنات نے کہا کہ چیئرمین پی ٹی آئی نے صرف ایک دن آنا ہے، کیا مشکل ہے، شریک ملزمان کی تعداد زیادہ ہے، الگ سے حاضری کا انتظام کرنا مشکل ہوگا
چیئرمین پی ٹی آئی کو 25 ستمبر کو تھانہ رمنا، تھانہ سی ٹی ڈی اور سنگجانی میں 12 اکتوبر اور تھانہ گولڑہ میں 5 اکتوبر کو درج دو مقدمات میں طلبی کے نوٹس جاری کیے گئے ہیں۔