اردوورلڈ کینیڈا ( ویب نیوز )اسلام آباد کی انسداد دہشت گردی کی عدالت نے ایمان مزاری اور علی وزیر کو 3 روزہ جسمانی ریمانڈ پر پولیس کے حوالے کردیا۔
سابق رکن قومی اسمبلی علی وزیر اور ایمان مزاری کو دہشت گردی کی دفعات کے تحت درج مقدمے میں انسداد دہشت گردی کی عدالت میں پیش کیا گیا۔

پراسیکیوٹر نے دونوں کے 10، 10 روزہ جسمانی ریمانڈ کی استدعا کی تاہم عدالت نے ایمان مزاری اور علی وزیر کو 3، 3 روزہ جسمانی ریمانڈ پر پولیس کے حوالے کردیا۔
علی وزیر نے غلطی سے جج کو سپیکر کہہ دیا۔
علی وزیر کو چہرے پر کپڑا باندھ کر عدالت لایا گیا، علی وزیر روسٹرم پر آئے اور موقف اختیار کیا کہ کچھ غلط نہیں کہا گیا، ہم نے کہا ہم اپنا پیغام اسلام آباد پہنچانا چاہتے ہیں۔
سابق رکن قومی اسمبلی علی وزیر نے غلطی سے انسداد دہشت گردی کی عدالت کے جج کو سپیکر کہہ دیا جس پر جج ابوالحسنات نے کہا کہ کوئی حرج نہیں، میں بھی سن رہا ہوں، آپ سپیکر کہہ سکتے ہیں، ملک ہے تو ہم ہیں، کتنا پیارا ہے ملک ہمارا
انسداد دہشت گردی کی عدالت کے جج ابوالحسنات ذوالقرنین نے فریقین کے دلائل سننے کے بعد محفوظ کیا گیا فیصلہ سنایا۔