اردوورلڈ کینیڈا ( ویب نیوز )یوم دفاع کے موقع پر اپنے پیغام میں عسکری قیادت نے کہا ہے کہ ہم بحیثیت قوم ان تمام شہداء کی قربانیوں کے مقروض ہیں جنہوں نے پاکستان کے پرچم کو سربلند رکھنے کے لیے اپنی جانوں کا نذرانہ پیش کیا۔

پاک فوج کے شعبہ تعلقات عامہ (آئی ایس پی آر) کے مطابق 58ویں یوم دفاع کے موقع پر چیئرمین جوائنٹ چیفس آف اسٹاف کمیٹی، سروسز چیفس اور افواج پاکستان کی جانب سے خصوصی پیغام جاری کیا گیا ہے جس میں پاک فوج کی  قیادت نے شہداء کو خراج عقیدت اور ان کے لواحقین کو خراج عقیدت پیش کیا۔

عسکری قیادت نے اپنے پیغام میں کہا کہ 1965 کے آج کے دن حق و باطل کی جنگ ہوئی، ثابت ہوا کہ بہادر قوم اپنی سرحدوں کی حفاظت کے لیے ہمہ وقت تیار رہتی ہے، اس دن مادر وطن کے ہزاروں بیٹوں نے اپنی جانوں کا نذرانہ پیش کیا  جوانوں نے قربانی کی سرزمین کے دفاع کو ناقابل تسخیر بنا دیا۔

افواج پاکستان کے سربراہان کا مزید کہنا تھا کہ آج پوری قوم ان شہداء کی قربانیوں کو سلام پیش کرتی ہے، ہم بحیثیت قوم شہداء کی قربانیوں کے مقروض ہیں، مسلح افواج ہر قسم کے اندرونی و بیرونی خطرات سے دفاع وطن کے لیے پرعزم ہیں  ، پاکستان کو نقصان پہنچانے کی کسی بھی کوشش کو ناکام بنایا جائے گا۔