اردو ورلڈ کینیڈا(ویب نیوز)انٹر سروسز پبلک ریلیشنز (آئی ایس پی آر) کے مطابق شمالی وزیرستان کے ضلع میرانشاہ میں خودکش حملہ ناکام بنا دیا گیا، دھماکے کے نتیجے میں 3 جوان شہید ہوگئے۔
پاک فوج کے شعبہ تعلقات عامہ کے مطابق خودکش حملہ آور کا مقصد سیکیورٹی فورسز کی چوکی کو نشانہ بنانا تھا۔
آئی ایس پی آر کے مطابق خودکش حملہ آور گاڑی میں سوار تھا، چیک پوسٹ پر روکے جانے پر خود کو اڑا لیا، پاک فوج کے جوانوں کی جرأت مندانہ کارروائی کے نتیجے میں بڑی تباہی ٹل گئی۔
خودکش حملہ میں شہید ہونے والوں میں نائب صوبیدار صاحب خان، نائیک محمد ابراہیم، سپاہی جہانگیر خان شامل ہیں۔
آئی ایس پی آر کے مطابق نائب صوبیدار صاحب خان شہید کی عمر 41 سال، تعلق میانوالی سے تھا، نائیک محمد ابراہیم کی عمر 40 سال، تعلق ڈیرہ اسماعیل خان سے تھا اور سپاہی جہانگیر خان کی عمر 24 سال، تعلق مردان سے تھا
پاک فوج کے شعبہ تعلقات عامہ کا کہنا ہے کہ پاکستان کی سکیورٹی فورسز دہشت گردی کی لعنت کو ختم کرنے کے لیے پرعزم ہیں، ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں
