اردو ورلڈ کینیڈا ( ویب نیوز )پنجاب پولیس نے میانوالی کے تھانہ مکڑوال پر دہشت گردوں کا حملہ ناکام بنا دیا، پولیس اہلکاروں کی جوابی فائرنگ سے حملہ آور فرار ہونے پر مجبور ہوگئے، انسپکٹر جنرل (آئی جی) پولیس پنجاب ڈاکٹر عثمان انور نے ایس ایچ او مکڑوال سے ٹیلی فون پر رابطہ کیا اور SHO اور محرر کی بہادری اور فرض شناسی پر حوصلہ افزائی کی۔
میانوالی پولیس حکام کے مطابق جدید ہتھیاروں سے لیس حملہ آوروں اور دہشت گردوں نے میانوالی میں مکڑوال تھانے پر حملہ کیا جس کا پولیس، کاؤنٹر ٹیررازم ڈیپارٹمنٹ (سی ٹی ڈی) اور دیگر فورسز نے بہادری سے مقابلہ کیا اور دہشت گردوں کو بھاگنے پر مجبور کردیا۔
ڈویژنل پولیس آفیسر (ڈی پی او) میانوالی محمد نوید حملے کے فوری بعد مزید نفری کے ہمراہ تھانہ مکڑوال پہنچ گئے
آئی جی پنجاب نے کہا کہ دہشت گرد عناصر کا تعاقب جاری رکھتے ہوئے انہیں انصاف کے کٹہرے میں لایا جائے، سی ٹی ڈی اور ایلیٹ فورس اور سپیشل برانچ آپریشن میں میانوالی پولیس کو بھرپور تعاون فراہم کریں۔
دوسری جانب آئی جی پنجاب ڈاکٹر عثمان انور نے میانوالی حملے کے پیش نظر خصوصی 4 رکنی ٹیم تشکیل دی ہے جس میں ایڈیشنل آئی جیز ٹریننگ، سپیشل برانچ، آپریشنز اور ڈی آئی جی آئی ٹی شامل ہیں، کمیٹی میں آر پی او سرگودھا بھی شامل ہیں۔
آئی جی پنجاب نے میانوالی بالخصوص تھانہ مکڑوال اور اس کے ملحقہ علاقوں میں سرچ اینڈ کومبنگ آپریشن تیز کرنے کی ہدایت کرتے ہوئے کہا کہ میانوالی میں دیگر قانون نافذ کرنے والے اداروں اور ایجنسیوں کے ساتھ مل کر بھرپور سرچ آپریشن کیا جائے، دہشت گرد عناصر اور ان کے سہولت کاروں کو گرفتار کیا جائے۔ زیرو ٹالرنس کے تحت کیفر کردار تک پہنچایا۔
نگران وزیراعلیٰ پنجاب کا خراج تحسین
علاوہ ازیں نگراں وزیراعلیٰ پنجاب محسن نقوی نے میانوالی کے تھانہ مکڑوال پر دہشت گردوں کے حملے کو ناکام بنانے پر پولیس کو خراج تحسین پیش کیا۔
محسن نقوی نے کہا کہ پنجاب پولیس کے بہادر جوانوں نے حوصلے سے دہشت گردوں کے مذموم عزائم کو خاک میں ملا دیا، پولیس جوانوں کی بہادری کو سلام پیش کرتے ہیں، دہشت گردوں کا حملہ ناکام بنانے والے بہادر جوانوں کو سلام۔
نگراں وزیراعلیٰ نے مزید کہا کہ پنجاب پولیس کے یہ جوان قوم کے ہیرو ہیں اور قوم کو اپنے بہادر بیٹوں پر فخر ہے۔
