اردو ورلڈ کینیڈا ( ویب نیوز)آڈیو لیکس کمیشن کی تحقیقات میں اہم پیشرفت ہوئی ہے اور آڈیو سے منسلک چار بڑی شخصیات کو کمیشن نے 27 مئی کو طلب کر لیا ہے۔

ذرائع کا کہنا ہے کہ کمیشن نے سابق چیف جسٹس ثاقب نثار کے صاحبزادے نجم ثاقب، صدر سپریم کورٹ بار عابد زبیری، سینئر وکیل طارق رحیم اور مبینہ آڈیوز میں سینئر وکیل سے بات کرنے والے صحافی کو طلب کیا ہے۔

اٹارنی جنرل آفس چاروں افراد کو جاری کیے گئے نوٹسز کی تعمیل کرائے گا جب کہ کمیشن کا اگلا اجلاس 27 مئی کو ہوگا۔

واضح رہے کہ وفاقی حکومت نے آڈیو لیکس کے معاملے پر 3 رکنی جوڈیشل کمیشن تشکیل دے دیا ہے۔ سپریم کورٹ کے سینئر ترین جج جسٹس قاضی فائز عیسیٰ کی سربراہی میں قائم کمیشن میں بلوچستان ہائی کورٹ اور اسلام آباد ہائی کورٹ کے چیف جسٹس شامل ہیں۔