اردو ورلڈ کینیڈا ( ویب نیوز)جلائو گھیرائو اور توڑ پھوڑ کا مقدمہ ،لاہور کی انسداد دہشت گردی کی عدالت نے پی ٹی آئی رہنماؤں فرخ حبیب اور اسد عمر کی عبوری ضمانت مسترد کردی۔

تفصیلات کے مطابق انسداد دہشت گردی کی عدالت میں جلاؤ گھیراؤ اور توڑ پھوڑ کے مقدمات میں پی ٹی آئی رہنماؤں کی عبوری ضمانت کی درخواستوں پر سماعت ہوئی، پی ٹی آئی رہنما یاسمین راشد، میاں اسلم اقبال زبیر خان نیازی عدالت میں پیش ہوئے۔

عدالت نے استفسار کیا کہ کیا ملزمان سے تفتیش ہوئی ہے، تفتیشی افسر نے جواب دیا کہ کوئی پوچھ گچھ نہیں ہوئی، ملزمان کے وکیل نے کہا کہ ان مقدمات پر جے آئی ٹی بنائی گئی ہے، عدالت نے ریمارکس دیئے کہ جے آئی ٹی ابھی بنی ہے۔۔

عدالت نے زبیر خان نیازی، ڈاکٹر یاسمین راشد، اسلم اقبال اور دیگر کو شامل تفتیش کرنے کا حکم دیا جب کہ عدم تعمیل کی بنیاد پر فرخ حبیب اور اسد عمر کی عبوری ضمانت مسترد کردی اور دیگر تینوں شریک ملزمان کی عبوری ضمانت میں 7اپریل تک توسیع کردی گئی ہے۔
یاد رہے کہ پولیس نے پی ٹی آئی رہنماؤں کے خلاف تھانہ شاد مان میں جلاؤ گھیراؤ اور توڑ پھوڑ کا مقدمہ درج کر رکھا ہے۔