اردوورلڈ کینیڈا( ویب نیوز)وزیر اعلیٰ پنجاب مریم نواز شریف نے یومِ شہداء پولیس کے موقع پر اپنے پیغام میں کہا ہے کہ پولیس کے شہداء کا مقدس خون ہماری ریاست کی بنیادوں میں شامل ہے، جسے ہم کبھی نظرانداز نہیں کر سکتے۔
انہوں نے کہا کہ پنجاب پولیس کے ان بہادر سپاہیوں کو سلام پیش کرتی ہوں جنہوں نے اپنی جانوں کا نذرانہ دے کر وطن عزیز میں امن و امان قائم کیا۔ کوئی ماں اپنے بیٹے سے محروم ہوئی، کسی خاتون کا سہاگ چھن گیا اور کئی بچے اپنے والد کے سائے سے محروم ہو گئے تاکہ ہم پرسکون زندگی گزار سکیں۔
پنجاب کے ہر محلے اور گلی میں جو امن ہے، وہ کسی شہید کی آخری سانس کا ثمر ہے۔
مریم نواز شریف نے کہا کہ ان عظیم ماؤں کو سلام جنہوں نے اپنے لعل وطن پر قربان کیے، اور ان سپوتوں کو خراجِ تحسین جنہوں نے کبھی سر جھکانے کو قبول نہ کیا۔ پولیس کے شہداء کا خون ریاست کا سب سے مضبوط ستون ہے۔
انہوں نے کہا کہ اصل طاقت وہ جوان ہیں جنہوں نے گولیوں کے سامنے ڈٹ کر سینہ سپر کیا اور ایک قدم پیچھے نہ ہٹے۔ ہم شہداء کے مشن کو جاری رکھیں گے اور ان کے خوابوں کو حقیقت میں بدلیں گے۔
پنجاب حکومت صرف زبانی دعووں تک محدود نہیں، بلکہ شہداء کے اہل خانہ کی عملی مدد، فلاحی پیکیجز اور ہر طرح کے ممکنہ تعاون کے ساتھ کھڑی ہے۔اختتام پر مریم نواز شریف نے عزم ظاہر کیا کہ پولیس شہداء کی قربانیاں ہمارے لیے مشعل راہ ہیں اور ان کا لہو ہمیشہ ہمارے دلوں میں زندہ رہے گا۔
