اردو ورلڈ کینیڈا ( ویب نیوز ) کینیڈا کے ہیلی فیکس شہر میں وال مارٹ اسٹور کی بیکری سے سکھ برادری سے تعلق رکھنے والی 19 سالہ لڑکی کی لاش ملی ہے۔ ہیلی فیکس ریجنل پولیس (HRP) نے کہا کہ انہیں ہفتہ کی رات 9:30 بجے کے قریب 6990 ممفورڈ روڈ پر والمارٹ میں بلایا گیا۔ پولیس کے مطابق لڑکی سٹور پر کام کرتی تھی تاہم ابھی تک اس کی شناخت نہیں ہو سکی ہے۔پولیس نے بتایا کہ اس کی لاش ایک بڑے واک ان اوون کے اندر سے ملی تھی۔
میری ٹائم سکھ سوسائٹی نے اس بات کی تصدیق کی کہ لڑکی ان کی کمیونٹی کی رکن ہے، یہ ہمارے اور اس کے خاندان کے لیے بہت افسوسناک ہے۔ وہ اپنے بہتر مستقبل کے لیے یہاں آئی تھی لیکن اپنی جان سے ہاتھ دھو بیٹھی۔ معلومات کے مطابق لڑکی حال ہی میں ہندوستان سے کینیڈا آئی تھی۔خاتون کی موت کی تحقیقات کے لیے ہفتہ کی رات سے دکان بند ہے۔ HRP کانسٹیبل مارٹن کروم ویل نے کہا کہ اس معاملے کی تفتیش پیچیدہ ہے۔ ہیلی فیکس ڈیپارٹمنٹ آف لیبر کے ترجمان نے کہا کہ بیکری اور وال مارٹ اسٹور پر کام روکنے کا حکم جاری کر دیا گیا۔
