اردوورلڈکینیڈا( ویب نیوز)وفاقی وزیر داخلہ محسن نقوی اور وزیر مملکت برائے داخلہ طلال چوہدری نے اسلام آباد کی مسجد خدیجتہ الکبریٰ کا دورہ کیا، مغرب کی نماز ادا کی اور خودکش دھماکے کے مقام کا جائزہ لیا۔
وزیر داخلہ نے کہا کہ معصوم نمازیوں اور مساجد پر حملے کرنے والے دہشت گرد خارجی سفاک عناصر ہیں اور واقعے میں ملوث افراد کو جلد گرفتار کیا جائے گا۔
محسن نقوی نے مزید کہا کہ پاکستان میں دہشت گردی کرنے والے عناصر کو غیر ملکی پشت پناہی حاصل ہے اور دشمن پاکستان کے امن، یکجہتی اور ترقی کو نقصان پہنچانا چاہتے ہیں، تاہم قوم ان کے خلاف متحد ہے۔ انہوں نے اس بات پر زور دیا کہ دہشت گرد اپنے مذموم عزائم میں کبھی کامیاب نہیں ہو سکیں گے۔
وزیر مملکت طلال چوہدری نے کہا کہ شہداء میں اسلام آباد کے آئی جی کا کزن بھی شامل ہے۔ انہوں نے واضح کیا کہ ملک بھر میں ہونے والے دہشت گردانہ حملوں میں ہمسایہ ملک کی مداخلت شامل ہے اور بھارت کی دہشت گردی میں ملوث ہونے کے شواہد دنیا کے سامنے پیش کیے جا چکے ہیں۔ طلال چوہدری نے کہا کہ دہشت گرد آسان اہداف کو نشانہ بنا رہے ہیں، لیکن پاکستان کی قوم اور سکیورٹی ادارے ان کے منصوبوں کو ناکام بنا رہے ہیں۔
