اردوورلڈ کینیڈا ( ویب نیوز)نگران وزیر توانائی محمد علی نے کہا ہے کہ بجلی کی قیمت کو کنٹرول کرنے پر تفصیلی غور کیا گیا ہے، امید ہے بجلی کے بلوں میں ریلیف کے معاملے پر پیر تک کوئی فیصلہ کر لیا جائے گا۔
تفصیلات کے مطابق نگراں وزیر اطلاعات و نشریات مرتضیٰ سولنگی نے نگراں وزیر خزانہ شمشاد اختر، وزیر تجارت گوہر اعجاز اور وزیر توانائی محمد علی کے ہمراہ مشترکہ پریس کانفرنس کی۔ ان کاکہنا تھا کہ ہمیں تیل اور گیس کی تلاش کے لیے اقدامات کرنا ہوں گے، انڈسٹری چلانے کے لیے گیس کی دستیابی ضروری ہے۔

نگراں وزیر توانائی نے کہا کہ ڈسکوز کی فروخت یا نجکاری پر بھی بات ہوئی ہے، لائن لاسز کو کم کرنے کے لیے بھی کام کیا جا رہا ہے اور سرمایہ کاری کو ایس آئی ایف سی کے تحت لانے پر بھی کام جاری ہے۔
اس موقع پر نگراں وزیر تجارت گوہر اعجاز نے کہا کہ صنعتیں بند ہونے سے چیزیں مہنگی ہوئیں اور سپلائی چین میں مسائل کی وجہ سے مہنگائی بھی بڑھی۔
انہوں نے کہا کہ معیشت کی بہتری کے لیے برآمدات کا فروغ وقت کی اہم ضرورت ہے، صنعت کی نجکاری کرنا ہوگی تاکہ ملک کے پہیے چلیں، صنعت چلے گی تو ملک کے پہیے چلیں گے اور کاروبار بڑھے گا.
گوہر اعجاز نے کہا کہ 2022 میں پاکستان کی ریکارڈ درآمدات 78 ارب ڈالر جبکہ برآمدات 32 ارب ڈالر تھیں۔ برآمدات میں اضافے سے مہنگائی میں کمی آئے گی۔ .
گوہر اعجاز نے کہا کہ سمگلنگ ملک کو نقصان پہنچا رہی ہے اس لیے اس پر قابو پانا ہو گا جس کے لیے اقدامات کیے جا رہے ہیں۔
پریس کانفرنس میں نگراں وزیر خزانہ شمشاد اختر نے کہا کہ معاشی بحالی کے لیے کوششیں جاری ہیں اور معیشت کی ترقی کے لیے مختلف امور کا بھی جائزہ لے رہے ہیں۔
شمشاد اختر نے کہا کہ معاشی بحالی کے لیے اصلاحات ناگزیر ہیں اور عام شہریوں کو معاشی طور پر خود مختار بنانا اولین ترجیح ہے۔