اردوورلڈ کینیڈا ( ویب نیوز )وزیر اعلیٰ بلوچستان میر عبدالقدوس بزنجو نے صوبائی اسمبلی تحلیل کرنے کے مشورے پر دستخط کر دیئے۔
ذرائع کے مطابق وزیراعلیٰ بلوچستان عبدالقدوس بزنجو کے دستخط کے بعد ایڈوائس منظوری کے لیے آج گورنر بلوچستان کو بھجوائی جائے گی۔
ذرائع کے مطابق وزیراعلیٰ بلوچستان جو کئی روز سے اسلام آباد میں مقیم ہیں اپنی جماعت بی اے پی کے رہنماؤں کی رائے لینے کے بعد دیگر سیاسی جماعتوں کے رہنماؤں سے مشاورت کر رہے ہیں۔
ذرائع کا کہنا ہے کہ اس وقت نگراں وزیراعلیٰ کے لیے جمعیت علمائے اسلام کی جانب سے سابق رکن قومی اسمبلی عثمان بادینی، بی این پی سے رکن صوبائی اسمبلی حمال کلمتی اور پاکستان پیپلز پارٹی کے علی حسن زہری کے نام دیے گئے تھے۔
اس کے علاوہ سابق بیوروکریٹ شبیر مینگل کا نام بھی زیر غور ہے۔
نگراں وزیراعلیٰ کا نام فائنل ہونے کے بعد 14 رکنی صوبائی نگراں کابینہ تشکیل دیئے جانے کا امکان ہے۔
واضح رہے کہ گورنر سندھ کامران ٹیسوری نے گزشتہ روز وزیراعلیٰ سندھ مراد علی شاہ کے مشورے پر سندھ اسمبلی تحلیل کردی تھی۔
گورنر سندھ کامران ٹیسوری نے سندھ اسمبلی تحلیل کرنے کی سمری پر دستخط کیے جس کے ساتھ ہی صوبائی کابینہ بھی تحلیل کردی گئی۔ سندھ اسمبلی چار سال 11 ماہ اور 29 دن چلی۔
