اردوورلڈکینیڈا( ویب نیوز)پاکستان سمیت دنیا بھر میں مسیحی برادری آج کرسمس کا تہوار منا رہی ہے۔ ملک کے مختلف شہروں میں گرجا گھروں میں خصوصی عبادات اور دعائیہ تقریبات کا سلسلہ جاری رہا۔ کراچی کے گرجا گھروں میں خصوصی تقریبات ہوئیں، جبکہ لاہور میں چرچز کو سجایا گیا اور خصوصی عبادات کا اہتمام کیا گیا۔ اسلام آباد میں بھی مسیحی برادری بڑی تعداد میں گرجا گھروں کا رخ کرتی دکھائی دی، اور کرسمس شاپنگ کے ساتھ عبادات میں مصروف رہی۔ سکیورٹی کے سخت انتظامات کیے گئے تاکہ شہری بلا خوف و خطر اپنے تہواری فرائض انجام دے سکیں۔

صدر آصف علی زرداری اور وزیراعظم شہباز شریف نے مسیحی برادری کو دلی مبارکباد دی۔ صدر نے کرسمس کو امن، امید اور ہمدردی کا پیغام قرار دیا، جبکہ وزیراعظم نے تمام اہل وطن کو تہوار کی خوشیاں مبارک دیتے ہوئے دعا کی کہ یہ کرسمس امن، استحکام اور خوشحالی لے کر آئے۔ انہوں نے کہا کہ مسیحی بھائی پاکستان میں فعال، مثبت اور پر امن کردار ادا کر رہے ہیں اور دہشت گردی کے خلاف جدوجہد میں قوم کے شانہ بشانہ قربانیاں دے کر فخر کا باعث ہیں۔

پاک فوج نے بھی ملک کی مسیحی برادری کو کرسمس کی مبارکباد پیش کی اور قومی ترقی میں ان کی گراں قدر خدمات کو سراہا۔