اردوورلڈ کینیڈا( ویب نیوز)صیہونی حکومت نے نام نہاد گریٹر اسرائیل کے متنازع نقشے جاری کر دئیے ہیں۔صیہونی حکومت کی جانب سے جاری کردہ نقشے میں مقبوضہ فلسطینی علاقوں کے علاوہ اردن، شام، لبنان اور دیگر عرب ممالک کو صہیونی ریاست کا حصہ دکھایا گیا ہے۔

فلسطین، سعودی عرب، قطر، اردن اور متحدہ عرب امارات نے نام نہاد تاریخی صہیونی ریاست کے اسرائیل کے متنازع نقشے کی مذمت کی ہے۔

سعودی عرب نے اسرائیل کے نقشے کی شدید مذمت کرتے ہوئے اسے مسترد کردیا۔

سعودی وزارت خارجہ کے مطابق اسرائیل نے نام نہاد گریٹر اسرائیل کے متنازع نقشے جاری کر دیئے۔ نقشوں میں عرب ممالک کے کچھ علاقوں کو نام نہاد گریٹر اسرائیل کا حصہ قرار دیا گیا ہے۔ اس طرح کے بے بنیاد اور انتہا پسندانہ اقدامات اسرائیلی حکام کے غاصبانہ عزائم کو ظاہر کرتے ہیں۔

وزارت خارجہ کا مزید کہنا تھا کہ عالمی برادری اسرائیلی خلاف ورزیوں کو روکنے کے لیے کردار ادا کرے۔

دوسری جانب قطری وزارت خارجہ کا کہنا ہے کہ یہ اقدام دیگر ممالک کی خودمختاری کی سنگین خلاف ورزی ہے۔