اردو ورلڈ کینیڈا ( ویب نیوز )پرتشدد انتہا پسندی کی روک تھام کا بل جس میں دھمکی، طاقت اور تشدد کے استعمال، نظریاتی عقائد، مذہبی اور سیاسی معاملات یا فرقہ واریت کی وجوہات کی بناء پر اکسانا یا حمایت کرنا ہے، جسے قانون کے تحت ممنوع قرار دیا گیا ہے، آج سینیٹ میں پیش کیا جائے گا۔
بل کے متن کے مطابق پرتشدد انتہا پسندی کسی فرد یا تنظیم کی مالی معاونت ہے جو پرتشدد انتہا پسند ہے، پرتشدد انتہا پسندی میں دوسروں کو طاقت کے استعمال، تشدد اور دشمنی پر اکسانا شامل ہے۔
کسی شیڈولڈ فرد کی حفاظت اور پناہ دینا متشدد انتہا پسندی ہے، پرتشدد انتہا پسندی کی وکالت کرنا اور اس مقصد کے لیے معلومات پھیلانا متشدد انتہا پسندی ہے۔ اگر حکومت مطمئن ہے کہ کوئی شخص یا تنظیم پرتشدد انتہا پسندی میں ملوث ہے تو اسے لسٹ ون اور ٹو میں شامل کیا جا سکتا ہے۔
حکومت پرتشدد افراد اور پرتشدد تنظیموں کی میڈیا تک رسائی یا اشاعت پر پابندی عائد کرے گی اور پاکستان کے اندر یا باہر پرتشدد افراد یا تنظیموں کے رہنماؤں یا افراد کی نقل و حرکت پر پابندی عائد کرے گی۔ حکومت پرتشدد تنظیم کے رہنماؤں، عہدیداروں اور ارکان کی سرگرمیوں کی نگرانی کرتے ہوئے پرتشدد تنظیم کے اثاثوں کی چھان بین کرے گی۔
حکومت پرتشدد تنظیم کے رہنماؤں اور اہلکاروں کے پاسپورٹ ضبط کر لے گی اور انہیں بیرون ملک سفر کی اجازت نہیں دی جائے گی۔ پرتشدد تنظیم کے سربراہ اور عہدیداروں کا اسلحہ لائسنس منسوخ کر دیا جائے گا جبکہ پرتشدد تنظیم کے اثاثے، جائیدادیں اور بینک اکاؤنٹس منجمد کر دیے جائیں گے۔
