اردو ورلڈ کینیڈا ( ویب نیوز ) سعودی عرب کے ولی عہد شہزادہ محمد بن سلمان 18 نومبر کو امریکی دارالحکومت واشنگٹن میں واقع صدارتی دفتر وائٹ ہاؤس میں امریکی صدر ڈونلڈ ٹرمپ سے ملاقات کریں گے۔
یہ اعلان ایک اعلیٰ سرکاری عہدیدار کی جانب سے کیا گیا ہے۔ یہ ملاقات ایسے وقت پر ہو رہی ہے جب امریکی انتظامیہ سعودی عرب کو "ابراہیم معاہدے” میں شامل کرنے کی کوشش کر رہی ہے۔ اس معاہدے کے تحت متحدہ عرب امارات، بحرین، سوڈان اور مراکش نے اسرائیل سے تعلقات معمول پر لائے، جبکہ سعودی عرب نے ابھی تک شمولیت سے گریز کیا ہے اور وہ فلسطینی ریاست کے قیام کے لیے ٹھوس اقدامات کا مطالبہ کرتا ہے۔
اس ملاقات میں دونوں ممالک کے درمیان دفاعی معاہدے پر بھی غور متوقع ہے۔ اطلاعات کے مطابق سعودی عرب جدید اسلحہ، میزائل نظام اور امریکہ کی جانب سے باضابطہ دفاعی ضمانتیں چاہتا ہے، جبکہ امریکہ خطے میں اپنی فوجی اور سیاسی موجودگی مزید مستحکم کرنا چاہتا ہے۔ دونوں ممالک کے تعلقات کئی دہائیوں سے تیل اور دفاعی تعاون پر قائم ہیں۔
گزشتہ مئی میں ٹرمپ کے دورۂ ریاض کے موقع پر امریکہ نے سعودی عرب کے ساتھ تقریباً 142 ارب ڈالر مالیت کا دفاعی ساز و سامان فروخت کرنے کا معاہدہ کیا تھا، جبکہ شہزادہ محمد بن سلمان نے امریکہ میں 600 ارب ڈالر کی سرمایہ کاری کا وعدہ کیا تھا۔ اس دوران ٹرمپ نے مزاحیہ انداز میں کہا تھا کہ یہ سرمایہ کاری “600 ارب نہیں بلکہ ایک کھرب ڈالر ہونی چاہیے تھی۔”صدر ٹرمپ نے ایک حالیہ گفتگو میں اعتماد ظاہر کیا تھا کہ سعودی عرب جلد یا بدیر ابراہیم معاہدے کا حصہ بن جائے گا، اور انہوں نے یہ بھی کہا تھا کہ مزید عرب ممالک کو بھی اسرائیل سے تعلقات بحال کرنے کے لیے راضی کیا جائے گا۔تجزیہ کاروں کے مطابق یہ ملاقات صرف سفارتی رابطہ نہیں بلکہ خطے کی سیاست، عالمی دفاعی توازن اور عرب—امریکہ تعلقات کے مستقبل پر گہرے اثرات ڈال سکتی ہے، خصوصاً ایسے وقت میں جب مشرقِ وسطی میں طاقت کا توازن تیزی سے تبدیل ہو رہا ہے۔
