اردوورلڈ کینیڈا ( ویب نیوز )امریکی ریاست ہوائی کے جنگلات میں لگنے والی آگ سے مرنے والوں کی تعداد 67 ہو گئی ہے۔
غیر ملکی میڈیا کے مطابق امریکی سیاحتی مرکز ہوائی میں تیزی سے پھیلتی جنگل کی آگ سے ہلاکتوں کی تعداد میں اضافہ ہو گیا ہے اور امدادی کارکن سب سے زیادہ متاثرہ جزیرے ماوئی سے لوگوں کو نکالنے کی کوششیں جاری رکھے ہوئے ہیں۔
میڈیا رپورٹس کے مطابق آگ سے سینکڑوں مکانات اور عمارتیں مکمل طور پر جل کر خاکستر ہو گئی ہیں جب کہ تیز ہواؤں کے باعث آگ بجھانے میں شدید مشکلات کا سامنا ہے۔

غیر ملکی میڈیا کا کہنا ہے کہ ریاست ہوائی میں آنے والی یہ بدترین قدرتی آفت ہے، گورنر کے مطابق جلے ہوئے گھروں میں اب بھی کئی افراد کی لاشیں ہیں۔
جنگل میں لگنے والی آگ نے تاریخی سیاحتی مقام لہینا کو بھی تباہ کر دیا، آگ نے کاؤنٹی ماوئی میں بجلی کا نظام بھی درہم برہم کر دیا اور کئی بجلی کے کھمبے بھی گر گئے۔
لوڈ شیڈنگ اور ٹیلی فون سروسز میں رکاوٹوں کے باعث صورتحال مزید خراب ہو گئی ہے جس سے انخلاء کی کوششوں میں رکاوٹ پیدا ہو رہی ہے۔
دوسری جانب امریکی صدر بائیڈن نے بھی ہوائی کے جنگلات میں لگنے والی آگ کو بڑا سانحہ قرار دیتے ہوئے تباہ شدہ جزیرے ماوئی کی تعمیر نو کے لیے وفاقی فنڈز کا وعدہ کیا۔
وائٹ ہاؤس نے ایک بیان میں کہا کہ وفاقی ڈیزاسٹر امداد کا مقصد جنگل کی آگ سے متاثرہ علاقوں میں ریاستی اور مقامی بحالی کی کوششوں کو تیز کرنا ہے۔