اردو ورلڈ کینیڈا ( ویب نیوز )تحریک انصاف کی جانب سے ریلی کے اعلان کے بعد نگرا ن پنجاب حکومت نے رینجرز کو لاہور طلب کر لیا ہے۔
پنجاب حکومت نے تحریک انصاف کی ریلی کو روکنے کے لیے رینجرز کو طلب کر لیا، رینجرز کو زمان پارک کے ساتھ ساتھ لاہور کے دیگر اہم مقامات پر تعینات کیا جائے گا۔
یاد رہے کہ گزشتہ روز وزارت داخلہ پنجاب نے لاہور میں دفعہ 144 نافذ کرتے ہوئے کسی بھی قسم کے جلسے یا جلوس پر پابندی عائد کر دی تھی۔
پنجاب کے وزیر داخلہ عامر میر نے کہا کہ دفعہ 144 صرف آج کے لیے ہے، اگر حالات خراب ہوئے تو اسے مزید بڑھایا جا سکتا ہے۔ دفعہ 144 کے تحت لاہور میں کسی بھی قسم کی ریلی پر پابندی ہوگی۔ حکومت نے کسی بھی ناخوشگوار واقعے سے نمٹنے کے لیے رینجرز کو طلب کر لیا ہے۔
وزیر داخلہ پنجاب کا کہنا تھا کہ 12 مارچ کو لاہور میں پی ایس ایل کا میچ ہے، آج لاہور میں میراتھن ریس اور سائیکل ریس کے ایونٹس ہیں، ان تمام ایونٹس کا فیصلہ ایک ماہ قبل کیا گیا تھا، تاہم عمران خان نے اچانک سیاسی جلسے کا اعلان کردیا۔ ان واقعات کے باوجود شہر میں میچ اور خواتین کے مارچ سے قبل ہی انہوں نے ریلی کا اعلان کیا۔
صوبائی وزیر داخلہ نے کہا کہ اگر پی ٹی آئی کی جانب سے مزاحمت ہوئی تو دفعہ 144 میں توسیع کردی جائے گی، انتخابی مہم 6 اپریل سے شروع ہوگی اور اس سے قبل جو کچھ ہوا اسے سیاسی سرگرمی تصور کیا جائے گا۔
