اردوورلڈ کینیڈا ( ویب نیوز )الیکشن کمیشن آف پاکستان کا کہنا ہے کہ وہ 22 اگست کو پاکستان تحریک انصاف (پی ٹی آئی) کے چیئرمین پر فرد جرم عائد کریں گے۔
چیئرمین پی ٹی آئی کے خلاف توہین عدالت کیس کی سماعت الیکشن کمیشن کے رکن نثار درانی کی سربراہی میں 4 رکنی کمیشن نے کی۔

دوران سماعت پی ٹی آئی چیئرمین کے وکیل نے موقف اختیار کیا کہ انہیں کیس کا مکمل ریکارڈ فراہم نہیں کیا گیا اور سماعت ملتوی کرنے کی استدعا کی۔
وکیل شعیب شاہین نے کہا کہ عدالتی تعطیلات کے باعث آئندہ سماعت ستمبر میں ہو، ممبر الیکشن کمیشن نے کہا کہ اگست کی تاریخ لے لیں، پھر مصروف ہوں گے۔
پی ٹی آئی کے وکیل نے چیئرمین پی ٹی آئی کی ذاتی حاضری سے استثنیٰ کی درخواست بھی دائر کی۔
وکیل پی ٹی آئی چیئرمین نے کہا کہ چیئرمین پی ٹی آئی میڈیکل چیک اپ کے لیے ہسپتال گئے ہیں، وہ کئی دنوں سے روزانہ عدالتوں میں پیش ہو رہے ہیں۔
ممبر الیکشن کمیشن اکرام اللہ خان نے کہا کہ پی ٹی آئی چیئرمین کے خلاف آج الزامات عائد کیے جانے تھے، انہوں نے استفسار کیا کہ کیا پی ٹی آئی چیئرمین آئندہ سماعت پر خود پیش ہوں گے؟ جس پر پی ٹی آئی چیئرمین کے وکیل نے کہا کہ امید ہے اگلی پیشی پر حاضر ہونے کی پوری کوشش کریں گے۔
ممبر الیکشن کمیشن نے کہا کہ پی ٹی آئی چیئرمین کی اگلی پیشی لازمی ہے، چارج کریں گے اور سماعت 22 اگست تک ملتوی کردی۔