اردوورلڈ کینیڈا( ویب نیوز)ایک نئی رپورٹ کے مطابق اونٹاریو میں ایمرجنسی روم کے انتظار کے اوقات اتنے زیادہ ہو گئے ہیں کہ گزشتہ سال تقریباً تین لاکھ مریض بغیر علاج واپس چلے گئے۔اونٹاریو لبرل ہیلتھ کے نقاد ڈاکٹر عادل شمجی نے کہا:یہ ایک بہت بڑا نمبر ہے، ہمارے اسپتال گنجائش سے زیادہ بھرے ہوئے ہیں۔
پبلک پالیسی تھنک ٹینک کی نئی رپورٹ "Too many Canadians are Leaving Emergency Rooms Untreated” میں بتایا گیا کہ 2024 میں اونٹاریو میں 2,92,695 مریض ایمرجنسی روم سے بغیر علاج واپس گئے، جو کل 60 لاکھ ای آر وزٹس کا تقریباً 5 فیصد بنتا ہے۔
ڈاکٹر شمجی نے کہا کہ ہر اونٹاریو ٹیکس دہندہ فیملی ڈاکٹر اور صحت کی سہولت کے لیے پیسے دیتا ہے، اور جب زندگی اور موت کے لمحات ہوں تو انہیں وہ سہولت میسر آنی چاہیے۔ لیکن حقیقت یہ ہے کہ اس حکومت کے تحت انہیں وہ سہولت نہیں مل رہی۔
وزارت صحت کے ترجمان نے جواب میں کہا کہ حکومت صحت کے نظام میں ریکارڈ سرمایہ کاری کر رہی ہے۔ ان کا کہنا ہے کہ اونٹاریو ایمرجنسی کیئر اور اہم سرجریز کے کم ترین انتظار کے اوقات میں ملک میں سب سے آگے ہے، سب سے زیادہ لوگوں کو فیملی ڈاکٹر تک رسائی ہے اور سب سے بڑی ہیلتھ کیئر ورک فورس موجود ہے۔
تاہم، اب بھی 25 لاکھ اونٹیرینز ایسے ہیں جن کے پاس فیملی ڈاکٹر نہیں ہے، اور ناقدین کا کہنا ہے کہ مزید ڈاکٹرز ہی اسپتالوں پر بوجھ کم کر سکتے ہیں۔
ایک مثبت قدم
حکومت کے ساتھ نئے چار سالہ معاہدے میں اونٹاریو کے ڈاکٹروں کو اگلے تین سالوں میں 7.3 فیصد تنخواہوں میں اضافہ ملے گا۔ یہ پہلے سال کے 10 فیصد اضافے کے علاوہ ہے۔
اونٹاریو میڈیکل ایسوسی ایشن کی صدر ڈاکٹر زینب عبد الرحمن نے کہایہ ایک بڑا اضافہ ہے اور ایک مثبت قدم ہے۔”
اہم بات یہ ہے کہ فیملی ڈاکٹرز کو انتظامی کام کے لیے بھی معاوضہ دیا جائے گا۔ ڈاکٹر عبد الرحمن نے کہا کہ اس سے ان ڈاکٹروں کو اپنے پریکٹس میں رہنے کی ترغیب ملے گی جو پہلے ہی کام کر رہے ہیں اور نئے فارغ التحصیل ڈاکٹرز کو بھی پریکٹس میں آنے کی حوصلہ افزائی ملے گی۔
وزارت صحت کا کہنا ہے کہ نئے معاہدے میں ایسی سرمایہ کاری بھی شامل ہے جو فیملی ڈاکٹروں کو مزید مریض لینے کی ترغیب دے گی۔ وزارت نے مزید کہا کہ پالیسی میں کی گئی تبدیلیاں، جیسے فارماسسٹ کو مزید اختیارات دینا، صوبے بھر میں ایمرجنسی ڈیپارٹمنٹس پر دباؤ کم کرنے میں مدد کرے گی۔
