اردوورلڈ کینیڈا( ویب نیوز)وزیر دفاع خواجہ آصف نے کہا ہے کہ عمران خان کے خلاف شواہد ملٹری ٹرائل کی طرف جارہے ہیں، فیض حمید عمران خان کے خلاف وعدہ معاف گواہ بن سکتے ہیں۔
نجی ٹی وی کے پروگرام میں گفتگو کرتے ہوئے خواجہ آصف نے کہا کہ فیض حمید گرفتاری کے بعد سارا ملبہ عمران خان پر ڈالیں گے، فیض حمید کی خواہش ہوگی کہ سارا ملبہ بانی پی ٹی آئی پر پڑے۔
انہوں نے کہا کہ 9 مئی کو جس شہر میں بھی احتجاج ہوا وہاں فوجی تنصیبات کو خاص طور پر نشانہ بنایا گیا، کچھ لوگ انہیں ہدایت دے رہے تھے، یقینی ہے کہ یہ عمران خان کی ہدایات ہوںگی
وزیر دفاع نے کہا کہ ایک غم عمران خان کو اقتدار سے محرومی کا اور دوسرا جنرل فیض کا غم ہے وہ آرمی چیف بننا چاہتے تھے۔ اس حوالے سے انہوں نے مسلم لیگ ن سے رابطہ کیا۔ وہ کہتے تھے کہ اکتوبر میں ہماری حکومت آنے والی ہے، اس کا پس منظر یہ تھا کہ انہوں نے عدلیہ سے امیدیں وابستہ کر لی ہیں۔
انہوں نے کہا کہ جب نیب میں ترامیم کا سلسلہ شروع ہوا تو پرویز خٹک وزیر دفاع تھے، انہوں نے ہم سے رابطہ کیا، ہم نے ان سے اتفاق کیا، بات شروع کرنے کے لیے فیض حمید سے ان کی کلیئرنس آئی۔
خواجہ آصف نے مزید کہا کہ میاں شہباز شریف عمران خان سے مذاکرات کے لیے آخری حد تک گئے، غیر مشروط پیشکش کی، لیکن انہوں نے ایک بار بھی سیاسی قوتوں سے بات کرنے کی کوشش نہیں کی۔