شرپسند عناصر عوام اور مسلح افواج کے درمیان خلیج پیدا کرنے کی کوشش کر رہے ہیں،آرمی چیف

39

اردوورلڈ کینیڈا( ویب نیوز)آرمی چیف جنرل عاصم منیر نے کہا ہے کہ شرپسند عناصر عوام اور مسلح افواج کے درمیان خلیج پیدا کرنے کی کوشش کر رہے ہیں۔
پاک فوج کے شعبہ تعلقات عامہ (آئی ایس پی آر) کے مطابق چیف آف آرمی اسٹاف جنرل سید عاصم منیر نے یوم آزادی پر ریٹائرڈ فوجی افسران کے اعزاز میں استقبالیہ کا اہتمام کیا۔
تقریب میں ریٹائرڈ فوجی افسران اور جوانوں کی بڑی تعداد نے شرکت کی اور آرمی چیف جنرل سید عاصم منیر نے ریٹائرڈ افسران کی خدمات کو خراج تحسین پیش کیا۔
آئی ایس پی آر کے مطابق آرمی چیف نے ملک کے تحفظ کے لیے ریٹائرڈ فوجی جوانوں اور افسران کے کردار کو سراہتے ہوئے کہا ہے کہ سابق فوجی افسران کا پاکستان کی ترقی میں اہم کردار ہے۔
آرمی چیف نے چیلنجز کا مقابلہ کرنے کے لیے متحد رہنے کی ضرورت پر زور دیا اور کہا کہ ریٹائرڈ قیادت پاکستان کی ترقی میں اہم کردار ادا کرتی رہی۔
آئی ایس پی آر کے مطابق آرمی چیف نے جعلی خبروں اور پروپیگنڈے کے خطرات پر بات کرتے ہوئے کہا کہ شرپسند عناصر عوام اور مسلح افواج کے درمیان خلیج پیدا کرنے کی کوشش کر رہے ہیں۔
آرمی چیف جنرل سید عاصم منیر نے مزید کہا ہے کہ ریٹائرڈ فوجی افسران اور جوانوں اور قوم کی غیر متزلزل حمایت سے ایسی تمام سازشوں کو ناکام بنا دیا جائے گا۔
آئی ایس پی آر کے مطابق اس موقع پر ریٹائرڈ افسران اور جوانوں نے پاک فوج کی قیادت پر اعتماد کا اظہار کیا اور بیرونی اور اندرونی سیکیورٹی خطرات سے نمٹنے کے لیے مکمل تعاون کی یقین دہانی کرائی۔
پاک فوج کے شعبہ تعلقات عامہ کے مطابق تقریب کا مقصد پاک فوج کی موجودہ اور ریٹائرڈ قیادت کے درمیان مضبوط تعلق کو ظاہر کرنا تھا، ریٹائرڈ افسران اور جوان ملک کی خوشحالی اور سلامتی کے لیے متحد ہیں۔