اردوورلڈکینیڈا( ویب نیوز)وفاقی حکومت نے بجلی صارفین کے لیے ایک اور ریلیف پیکج متعارف کرانے کا فیصلہ کیا ہے، جس کے تحت آئی ایم ایف کی شرط کے مطابق عائد کیپٹو پاور لیوی سے حاصل ہونے والی رقم کو بجلی کے نرخ کم کرنے کے لیے استعمال کیا جائے گا۔ اس اقدام سے پاور سیکٹر میں ریلیف کی راہ ہموار ہوگی اور صارفین کی ماہانہ بلوں پر بوجھ کم ہوگا۔
حکومتی ذرائع کے مطابق کیپٹو پاور لیوی سے حاصل ہونے والی رقم کو ماہانہ بنیادوں پر بجلی صارفین کو ریلیف دینے کے لیے استعمال کیا جائے گا۔ جیسے جیسے لیوی کی شرح میں اضافہ ہوگا، اسی تناسب سے بجلی کے نرخ کم کرنے میں آسانی ہوگی۔ وفاقی کابینہ نے پہلے ہی اس بات کی منظوری دے دی ہے کہ کیپٹو پاور لیوی سے حاصل ہونے والا فائدہ براہِ راست صارفین کے ٹیرف میں منتقل کیا جائے۔
منصوبے کے مطابق لیوی کے نفاذ کا عمل مرحلہ وار ہوگا۔ اس وقت کیپٹو پاور پلانٹس پر 5 فیصد لیوی نافذ کر دی گئی ہے، جو بعد میں 10 فیصد، فروری 2026 میں 15 فیصد اور اگست 2026 تک 20 فیصد تک بڑھائی جائے گی۔ حاصل ہونے والی رقم بجلی کے تمام صارفین کے ٹیرف میں کمی کے لیے استعمال ہوگی۔ ذرائع نے بتایا کہ لیوی کی ادائیگی نہ کرنے والے پلانٹس کے خلاف کارروائی کی جائے گی اور مستقل ڈیفالٹ کی صورت میں متعلقہ پلانٹ کی گیس کی فراہمی منقطع کر دی جائے گی۔ ہر پلانٹ گیس یا ایل این جی کے استعمال پر وفاقی حکومت کو لیوی ادا کرنے کا پابند ہوگا۔
یہ اقدام صارفین کو ماہانہ ریلیف دینے کے ساتھ ساتھ پاور سیکٹر میں شفافیت اور مالی استحکام کو بھی فروغ دے گا، جبکہ کیپٹو پاور پلانٹس کی ذمہ داریوں کو یقینی بنانے میں مددگار ثابت ہوگا۔
