اردوورلڈ کینیڈا ( ویب نیوز)پاکستان تحریک انصاف نے قومی اسمبلی میں منظور کی گئی حکومتی قرارداد کو مسترد کر دیا۔
گزشتہ روز قومی اسمبلی نے 9 مئی کے شرپسندوں کے خلاف ملٹری ایکٹ کے تحت مقدمات چلانے کی قرارداد منظور کی۔
سپیکر راجہ پرویز اشرف کی زیر صدارت قومی اسمبلی کا اجلاس ہوا جس میں وزیر دفاع خواجہ آصف نے پاکستان تحریک انصاف (پی ٹی آئی) کے خلاف قرارداد پیش کی۔

9 مئی واقعات میں ملو ث کرداروں کیخلاف کارروائی کی جائے ،اسمبلی میں قرارداد منظور

9 مئی کے حوالے سے مذمتی قرارداد کے متن کے مطابق 9 مئی کو ایک جماعت اور اس کے سربراہ نے تمام حدیں پار کرتے ہوئے آئین و قانون کی خلاف ورزی کرتے ہوئے فوجی تنصیبات پر حملہ کیا اور ان کے حملوں نے ریاستی اداروں اور ملک کو ناقابل تلافی نقصان پہنچایا ان کے خلاف آئین و قانون کے تحت کارروائی مکمل کی جائے۔
قومی اسمبلی نے 9 مئی کے شرپسندوں کے خلاف ملٹری ایکٹ کے تحت مقدمات چلانے کی قرارداد کی منظوری دے دی۔
بعد ازاں پی ٹی آئی نے قومی اسمبلی میں منظور ہونے والی قرارداد کو مسترد کرتے ہوئے کہا کہ حکومتی قرارداد 9 مئی کے اصل منصوبہ سازوں کو بچانے کی کوشش ہے۔
پی ٹی آئی کی جانب سے موقف اختیار کیا گیا کہ قرارداد پی ٹی آئی اور چیئرمین پی ٹی آئی پر الزام تراشی کی کوشش ہے۔