ishtiaq ahmed 
اردو ورلڈ کینیڈا ( ویب نیوز ) وزیر خزانہ مفتاح اسماعیل نے ہفتہ کے روز کہا کہ قومی معیشت کو درست سمت پر لانے کے لیے حکومت کو پٹرولیم مصنوعات اور بجلی پر سبسڈی واپس لینے کے سخت فیصلے کرنے پڑے
ہفتہ کو کراچی میں ایک تقریب سے خطاب کرتے ہوئے وزیر خزانہ نے کہا کہ لگژری آئٹمز کی درآمد پر پابندی اگلے ماہ تک برقرار رہے گی، کیونکہ یہ قومی معیشت کے مفاد میں ہے۔
تاہم انہوں نے کہا کہ صرف برآمدی معاون اشیا کی درآمد پر غور کیا جا سکتا ہے۔
مفتاح اسماعیل نے کہا کہ حکومت کی دانشمندانہ پالیسیوں کی وجہ سے قومی معیشت درست سمت میں گامزن ہے اور اس کے استحکام کے لیے اقدامات کیے جا رہے ہیں۔
وزیر خزانہ نے یقین دلایا کہ تاجر برادری کے مسائل ترجیحی بنیادوں پر حل کیے جائیں گے۔
انہوں نے تاجر برادری پر زور دیا کہ وہ قومی معیشت کے استحکام کے لیے حکومت کی کوششوں میں تعاون کریں۔
