اردو ورلڈ کینیڈا ( ویب نیوز)بین الاقوامی مالیاتی فنڈ (آئی ایم ایف) کا وفد نویں جائزہ اجلاس کے لیے پاکستان پہنچ گیا ہے۔ اقتصادی جائزے کے لیے مذاکرات آج سے شروع ہوں گے۔

ذرائع کے مطابق آئی ایم ایف مشن نویں اقتصادی جائزے پر مذاکرات کرے گا، جو دس روز تک جاری رہے گا، پہلے مرحلے میں چار روز تک تکنیکی سطح کے مذاکرات ہوں گے، مذاکرات کامیاب ہونے کی صورت میں ایک ارب ڈالر کی قسط دی جائے گی۔

ذرائع کا کہنا ہے کہ آئی ایم ایف کا وفد فیڈرل بورڈ آف ریونیو (ایف بی آر)، نیشنل الیکٹرک پاور ریگولیٹری اتھارٹی (نیپرا)، آئل اینڈ گیس ریگولیٹری اتھارٹی (اوگرا) اور وزارت خزانہ کے حکام سے ملاقات کرے گا۔

وفد توانائی کے شعبے میں قرضوں کی گردش کرنے والی صورتحال، اقتصادی پالیسیوں کے استحکام کے روڈ میپ اور مالیاتی پوزیشن کو مستحکم کرنے کے اقدامات کا جائزہ لے گا۔