اردو ورلڈ کینیڈا ( ویب نیوز ) بنگلہ دیش کے آرمی چیف جنرل وقار الزمان نے کہا ہے کہ محمد یونس کی سربراہی میں 15 رکنی ٹیم آج (جمعرات) کی شام تک حلف اٹھائے گی۔ملک میں کئی ہفتوں سے جاری احتجاج کے نتیجے میں سابق وزیراعظم شیخ حسینہ واجد کے استعفیٰ اور ان کی بھارت روانگی کے بعد جنرل وقار الزماں نے پیر کو عبوری حکومت کے قیام کا اعلان کیا۔
رپورٹ کے مطابق بنگلہ دیش میں شیخ حسینہ واجد کے خلاف احتجاج کے دوران 400 افراد ہلاک ہو گئے۔غیر ملکی خبر رساں ادارے کا کہنا تھا کہ نئی حکومت کے متوقع سربراہ محمد یونس آج فرانس سے وطن واپس پہنچیں گے۔یاد رہے کہ محمد یونس نے شیخ حسینہ واجد کے خلاف احتجاج کرنے والے طلبہ کو مبارکباد دیتے ہوئے اسے ملک کی دوسری فتح قرار دیا۔انہوں نے کہا کہ ہمیں اپنی نئی فتح کو بہتر بنانا چاہیے اور اسے اپنی غلطیوں سے ضائع نہیں ہونے دینا چاہیے۔محمد یونس نے ایسی کشیدگی سے بچنے پر زور دیا تھا جس سے ملک کا نقصان ہو۔
