اردوورلڈکینیڈا( ویب نیوز)پاکستان نے کہا ہے کہ دریائے چناب کے بہاؤ میں اچانک تبدیلی ناقابل قبول ہے اور عالمی برادری کو بھارت کی جانب سے سندھ طاس معاہدے کی خلاف ورزی کا نوٹس لینا چاہیے۔
وزارت خارجہ کے ترجمان طاہر حسین اندرابی نے کہا کہ بھارتی اقدامات خطے کے امن و استحکام کے لیے خطرہ ہیں اور دریاؤں کے حوالے سے کوئی یکطرفہ اقدام قابل قبول نہیں۔ انہوں نے بھارت کی جانب سے سندھ طاس معاہدے کی خلاف ورزی کی سخت مذمت کی۔
ترجمان نے مزید کہا کہ سندھ طاس معاہدے کے تحت بین الاقوامی قوانین موجود ہیں، اور دریائے چناب میں اچانک پانی کے بہاؤ میں تبدیلی تشویشناک ہے۔ عالمی برادری کو بھارت کی اس خلاف ورزی پر فوری توجہ دینی چاہیے۔
اندرابی نے بتایا کہ دسمبر سے دریائے چناب میں پانی کی سطح میں غیر معمولی اتار چڑھاؤ دیکھا گیا ہے، اور بھارت کی جانب سے بغیر اطلاع پانی چھوڑنے پر پاکستان شدید تحفظات رکھتا ہے۔
ترجمان نے کہا کہ بھارت میں اقلیتوں کے ساتھ ناروا سلوک جاری ہے، خاص طور پر بہار کی ریاست میں مسلم خاتون ڈاکٹر کے ساتھ ہتک آمیز رویے کی مذمت کرتے ہیں۔ انہوں نے بھارتی حکومت پر زور دیا کہ وہ اقلیتوں کے حقوق، خاص طور پر مذہبی آزادی، کا تحفظ یقینی بنائے۔
