اردوورلڈ کینیڈا ( ویب نیوز)ہائی کورٹ نے چیئرمین پی ٹی آئی کے خلاف توشہ خانہ فوجداری مقدمہ ناقابل سماعت قرار دے دیا۔
اسلام آباد ہائی کورٹ نے ٹرائل کورٹ کے فیصلے کے خلاف چیئرمین پی ٹی آئی کی درخواست منظور کرلی۔ چیف جسٹس عامر فاروق نے محفوظ فیصلہ سنا دیا، جس کے مطابق عدالت نے توشہ خانہ فوجداری کارروائی کیس کو ناقابل سماعت قرار دے دیا۔

اس سے قبل ٹرائل کورٹ نے چیئرمین پی ٹی آئی کے خلاف ٹرائل کو قابل سماعت قرار دیا تھا، جس کے خلاف چیئرمین پی ٹی آئی نے درخواست دائر کی تھی، جس پر اسلام آباد ہائی کورٹ نے چیئرمین پی ٹی آئی کے خلاف کارروائی روک دی تھی بعد ازاں عدالت نے فیصلہ محفوظ کر لیا۔ اسلام آباد ہائی کورٹ کے فیصلے سے چیئرمین پی ٹی آئی کو کیس میں بڑا ریلیف مل گیا۔
واضح رہے کہ گزشتہ روز ہی چیئرمین پی ٹی آئی نے توشہ خانہ مقدمے کی سماعت کرنے والے چیف جسٹس عامر فاروق پر مشتمل بینچ پر عدم اعتماد کا اظہار کرتے ہوئے کیس کو دوسری عدالت میں منتقل کرنے کی درخواست کی تھی۔ انہوں نے پیر کو اپنے وکیل کے ذریعے اسلام آباد ہائی کورٹ میں اس حوالے سے درخواست دائر کی۔