الیکشن کمیشن نے قومی و صوبائی اسمبلیوں کے ریٹرننگ افسران کو مراسلہ ارسال کردیا ہے جس میں 145 سیاسی جماعتوں کے انتخابی نشانات کی فہرست ریٹرننگ افسران کو ارسال کردی گئی ہے۔تحریک انصاف سمیت 12 سے زائد سیاسی جماعتوں کے نام انتخابی نشانات کی فہرست میں نہیں، انٹرا پارٹی الیکشن نہ کرانے کے باعث ان سیاسی جماعتوں کے نشانات روک لیے گئے ہیں۔پاکستان پیپلز پارٹی پارلیمنٹرین کو تیر، پاکستان مسلم لیگ ن کو شیر، پاکستان تحریک انصاف نظریاتی کو بلے کا نشان الاٹ کیا گیا ہے۔
استحکام پاکستان پارٹی کو عقاب کا نشان، متحدہ قومی موومنٹ پاکستان کو پتنگ کا نشان، جمعیت علمائے اسلام پاکستان کو کتاب کا نشان، جماعت اسلامی پاکستان کو ترازو کا نشان دیا گیا ہے۔مراسلہ میں الیکشن کمیشن نے کہا ہے کہ سیاسی جماعتوں کے نامزد امیدواروں کو متعلقہ انتخابی نشان الاٹ کیے جائیں، سیاسی جماعتوں کے انتخابی نشان کسی آزاد امیدوار کو نہ دیئے جائیں۔آزاد امیدواروں کے الگ الگ انتخابی نشانات کی فہرست ریٹرننگ افسران کو ارسال کر دی گئی ہے۔الیکشن کمیشن نے ہدایت کی ہے کہ فہرست میں شامل انتخابی نشانات کے علاوہ امیدوار کو انتخابی نشان نہ دیا جائے۔
