اردوورلڈکینیڈا( ویب نیوز)محکمہ موسمیات نے سال 2026 کے دوران ہونے والے سورج اور چاند گرہن کا مکمل شیڈول جاری کر دیا ہے۔ جاری کردہ رپورٹ کے مطابق آئندہ برس دنیا بھر میں مجموعی طور پر چار فلکیاتی مظاہر دیکھنے کو ملیں گے، جن میں دو سورج گرہن اور دو چاند گرہن شامل ہیں۔
محکمہ موسمیات کے مطابق پہلا سورج گرہن 17 فروری 2026 کو ہوگا۔ یہ ایک جزوی سورج گرہن ہوگا جو پاکستان سمیت جنوبی ایشیا کے بیشتر ممالک میں نظر نہیں آئے گا۔ محکمہ نے بتایا کہ گرہن کا آغاز پاکستانی وقت کے مطابق دوپہر تین بجے ہوگا، اس کا عروج شام پانچ بجے آئے گا جبکہ اختتام رات ساڑھے سات بجے متوقع ہے۔ یہ منظر شمالی امریکا، یورپ کے کچھ حصوں اور شمالی افریقہ میں دیکھا جا سکے گا۔
دوسری جانب، سال کا پہلا چاند گرہن 3 مارچ 2026 کو پیش آئے گا۔ یہ جزوی چاند گرہن ہوگا جو پاکستان میں جزوی طور پر دیکھا جا سکے گا۔ ماہرینِ فلکیات کے مطابق یہ گرہن جنوبی ایشیا، مشرقِ وسطیٰ، یورپ اور افریقہ کے کئی حصوں میں نظر آئے گا۔ محکمہ موسمیات نے شہریوں کو مشورہ دیا ہے کہ وہ گرہن کے دوران موسمی حالات اور چاند کی حالت کے مطابق مشاہدے کی منصوبہ بندی کریں۔
تیسرا فلکیاتی مظہر سال کے وسط میں ہوگا جب 12 اور 13 اگست 2026 کو دوسرا سورج گرہن رونما ہوگا۔ محکمہ کے مطابق یہ سورج گرہن بھی پاکستان میں قابلِ مشاہدہ نہیں ہوگا۔ یہ مکمل سورج گرہن مغربی یورپ، شمالی افریقہ اور شمالی بحرِ اوقیانوس کے خطوں میں واضح طور پر دیکھا جا سکے گا۔
