پاکستان اور آئی ایم ایف کے درمیان پالیسی سطح پر مذاکرات جاری ہیں۔ ذرائع کے مطابق آئی ایم ایف نے 9415 ارب کا سالانہ ٹیکس ہدف برقرار رکھنے پر اتفاق کیا ہے جس کے بعد منی بجٹ نہیں آئے گا۔

ایف بی آر کے ذرائع کا کہنا ہے کہ نگراں حکومت کوئی نیا ٹیکس نہیں لگائے گی، آئی ایم ایف کو آگاہ کر دیا گیا ہے، آئی ایم ایف کو یقین دلایا گیا ہے کہ ٹیکس حکام ٹیکس ریونیو بڑھانے کے لیے انتظامی اقدامات کو بہتر بنائیں گے۔

ذرائع کے مطابق آئی ایم ایف کو بتایا گیا کہ معیشت کو دستاویزی شکل دے کر ٹیکس نیٹ بڑھانے کا بھی منصوبہ ہے۔

ذرائع کے مطابق ٹیکس ہدف کے حصول کا تحریری منصوبہ آئی ایم ایف کو فراہم کر دیا گیا ہے اور آئی ایم ایف کو 9415 ارب روپے کا ٹیکس ہدف حاصل کرنے کی یقین دہانی کرائی گئی ہے جب کہ رئیل اسٹیٹ سیکٹر سے ٹیکس چوری کے خاتمے کو بھی یقینی بنایا گیا ہے