اردو ورلڈ کینیڈا ( ویب نیوز ) امریکا اور اسرائیل کی جانب سے ایران کے خلاف فوجی کارروائیاں مزید تیز ہو گئی ہیں
اور تازہ اطلاعات کے مطابق امریکی B‑2 Spirit بمبار طیاروں نے بھی ایران کے خلاف حملوں کے لیے اپنا نیا مشن شروع کر دیا ہے۔امریکی فوج کی سینٹرل کمانڈ کے مطابق ان کارروائیوں کا بنیادی مقصد ایران کی مستقبل میں دوبارہ فوجی طاقت حاصل کرنے کی صلاحیت کو کمزور کرنا اور اس کی دفاعی تنصیبات کو نشانہ بنانا ہے۔اطلاعات کے مطابق حالیہ حملوں میں ایران کے تہران سمیت کئی اہم شہروں کو نشانہ بنایا گیا ۔ ذرائع کے مطابق ان حملوں میں فوجی تنصیبات، اسلحہ سازی کے مراکز اور اسلحہ ذخیرہ کرنے کے مقامات کو ہدف بنایا گیا۔
دوسری جانب اسرائیلی حکام نے دعویٰ کیا ہے کہ گزشتہ چوبیس گھنٹوں کے دوران اسرائیلی فضائیہ نے ایران میں دو سو سے زائد اہداف کو نشانہ بنایا ہے۔ اسرائیلی فوج کے مطابق لڑاکا طیاروں نے کم از کم بیس بڑے فضائی حملے کیے جن میں ایرانی فوجی تنصیبات، میزائل پروگرام سے متعلق مراکز اور اسلحہ کے ذخائر کو نشانہ بنایا گیا۔
ادھر امریکا نے خطے میں اسرائیل کے دفاع کو مزید مضبوط بنانے کے لیے جنوبی کوریا میں نصب جدید میزائل دفاعی نظام اسرائیل منتقل کرنے کا فیصلہ کیا ہے۔ امریکی حکام کے مطابق اس اقدام کا مقصد اسرائیل کو ممکنہ میزائل حملوں سے بچانے کے لیے اس کے دفاعی نظام کو مزید مؤثر بنانا ہے۔اس سے قبل امریکی وزیر دفاع نے ایک بیان میں دعویٰ کیا تھا کہ ایرانی حکومت کی قیادت زیرِ زمین محفوظ مقامات پر منتقل ہو چکی ہے کیونکہ آئندہ حملے پہلے سے زیادہ شدید ہوں گے۔
انہوں نے مزید کہا کہ امریکا اپنی کارروائیاں جاری رکھے گا اور اس معاملے میں کسی قسم کی پسپائی اختیار نہیں کی جائے گی۔ ان کا کہنا تھا کہ خلیج میں واقع اہم آبی گزرگاہ کی صورتحال پر عالمی برادری کو غیر ضروری طور پر پریشان ہونے کی ضرورت نہیں۔دفاعی ماہرین کے مطابق اگر خطے میں کشیدگی اسی طرح برقرار رہی تو یہ صورتحال مشرقِ وسطیٰ میں بڑے پیمانے پر فوجی تصادم کا سبب بن سکتی ہے، جس کے عالمی سیاست اور توانائی کی منڈیوں پر بھی گہرے اثرات مرتب ہونے کا خدشہ ظاہر کیا جا رہا ہے۔
