Imran 
اردو ورلڈ کینیڈا ( ویب نیوز ) ٹی 20 ورلڈ کپ میں آج کینیڈا کا مقابلہ پاکستان سےہو گا ، ماضی میں پاکستان کے لیے انڈر 19 کھیلنے والے کینیڈین بولر کلیم ثنا ٹی ٹوئنٹی ورلڈ کپ میں اپنے پرانے ساتھی بابر اعظم کی وکٹ لینے کے لیے پر امید ہیں۔میچ سے قبل کینیڈین ٹیم کے فاسٹ بولر کلیم ثناء نے کہا کہ انہیں 2009 میں پاکستان انڈر 19 ٹیم سے منتخب کیا گیا تھا، 2010 میں انڈر 19 ورلڈ کپ کے لیے منتخب کیا گیا تھا، بابر اعظم کے ساتھ 8 سال انڈر 16 کرکٹ کھیلی۔
بابر پاکستان میں کھیلے گئے آخری فرسٹ کلاس میچ میں بھی حریف ٹیم میں شامل تھے۔کلیم ثنا کا کہنا تھا کہ میں پاکستان میں پیدا ہوا، لیکن اب میں کینیڈین کھلاڑی ہوں، ورلڈ کپ کے میچ کے لیے پرجوش ہوں، میرے خاندان اور دوست احباب جو پاکستان میں ہیں، ان کی حمایت تقسیم ہو جائے گی، میری فیملی مجھے سپورٹ کرے گی لیکن وہ چاہتے ہیں پاکستان جیتے۔
کینیڈین ٹیم کے فاسٹ بولر کا کہنا تھا کہ ہم نے ورلڈ کپ کے لیے بہت محنت کی ہے، اس وقت کینیڈین ٹیم کا مورال کافی بلند ہے، پاکستان دو میچ ہارنے کے بعد دباؤ میں ہوگا، ہم پاکستان کو ہرانے کی منصوبہ بندی کررہے ہیں۔انہوں نے کہا کہ ہم بھی ورلڈ کپ کھیلنے آئے ہیں اور اچھا کر رہے ہیں، میں نیا بولر ہوں اس لیے میرا ہدف بابر اور رضوان کی وکٹ لینا ہے، بچپن کی دوستی بابر سے مقابلے کی راہ میں نہیں آئے گی۔کلیم ثنا نے کہا کہ بابر اب بھی چار بہترین بلے بازوں میں سے ایک ہیں۔
