اردوورلڈ کینیڈا( ویب نیوز)وزیراعظم محمد شہبازشریف نے کہا ہے کہ وطن کے دفاع میں افواج پاکستان کی قربانیوں کو قوم کبھی فراموش نہیں کرے گی۔
وزیراعظم نے لانس نائیک محمد محفوظ شہید نشان حیدر کو خراج عقیدت پیش کیا جنہوں نے 1971 کی جنگ میں جرات اور بہادری کا مظاہرہ کرتے ہوئے اپنی جان کا نذرانہ پیش کیا
وزیراعظم نے اپنے بیان میں کہا کہ 1971 میں واہگہ بارڈر پر مثالی بہادری کا مظاہرہ کرتے ہوئے لانس نائیک محمد محفوظ شہید نشان حیدر دشمن کو پسپا کرتے رہے۔ لانس نائیک محمد محفوظ شہید نے دشمن کی طاقت اور عددی برتری کے نشے کو تہس نہس کر دیا۔
انہوں نے کہا کہ لانس نائیک محمد محفوظ شہید فرض شناسی اور جذبہ حب الوطنی کی سیسہ پلائی ہوئی دیوار ثابت ہوئے جنہوں نے وطن عزیز کو دشمنوں کے ناپاک عزائم سے محفوظ رکھا۔ لانس نائیک محمد محفوظ شہید کی وطن سے وابستگی اور دفاع وطن کے لیے جان کا نذرانہ پیش کرنے کا جذبہ نئی نسل کے لیے مشعل راہ ہے۔
شہباز شریف نے مزید کہا ہے کہ مجھ سمیت پوری قوم کو پاک فوج کے شہداء اور ان کے اہل خانہ پر فخر ہے۔ پاکستانی قوم دفاع وطن کے لیے افواج پاکستان کی قربانیوں کو کبھی فراموش نہیں کرے گی۔
