175
اردو ورلڈ کینیڈا ( ویب نیوز )قومی اسمبلی نے پنجاب اور خیبرپختونخوا میں انتخابات کے لیے 21 ارب روپے دینے کا بل مسترد کر دیا۔
سپریم کورٹ نے وفاقی حکومت کو پنجاب اور خیبرپختونخوا کے انتخابات کے لیے 10 اپریل تک الیکشن کمیشن کو 21 ارب روپے فراہم کرنے اور اس حوالے سے الیکشن کمیشن کو 11 اپریل تک رپورٹ جمع کرانے کا حکم دیا تھا تاہم فنڈز فراہم نہیں کیے جا سکے۔
اس حوالے سے چیف جسٹس پاکستان نے گزشتہ روز نوٹس جاری کرتے ہوئے سیکر ٹری خزانہ، سیکر ٹری الیکشن کمیشن اور گورنر اسٹیٹ بینک کو اپنے چیمبر میں طلب کرلیا۔
آج سپریم کورٹ نے کیس کی سماعت کے لیے صدر اور وزیراعظم سمیت تمام متعلقہ فریقین کو نوٹس جاری کر د ئیے ہیں۔
تاہم اب اطلاعات ہیں کہ قومی اسمبلی نے پنجاب اور خیبرپختونخوا میں انتخابی اخراجات کے لیے الیکشن کمیشن کو 21 ارب روپے فراہم کرنے کا بل مسترد کر دیا ہے۔
اس سے قبل قومی اسمبلی اور سینیٹ کی قائمہ کمیٹی برائے خزانہ نے بھی پنجاب اور خیبرپختونخوا میں انتخابات کے لیے فنڈز کی فراہمی کے بل کو مسترد کر دیا تھا۔
