اردوورلڈکینیڈا(ویب نیوز)نجی ٹی وی کے مطابق راولپنڈی میں انسداد منشیات عدالت میں مقدمات کی بڑھتی ہوئی تعداد کے پیش نظر ایک نئی عدالت قائم کرنے کا فیصلہ کر لیا گیا ہے۔ پرانی ضلع کچہری کے ایک کمرے کو نئی عدالت کے لیے منتخب کیا گیا ہے۔

ذرائع کے مطابق، اس وقت انسداد منشیات عدالت میں 653 ریکارڈ مقدمات زیر سماعت ہیں، جس کے باعث نئی عدالت کی ضرورت پیش آئی۔ نئی عدالت کو "انسداد منشیات کی خصوصی عدالت نمبر 2” کا نام دیا جائے گا۔

نئی عدالت کے جج کے طور پر سینئر ڈسٹرکٹ اینڈ سیشن جج راجا غضنفر تعینات ہوں گے، جبکہ ضیا کیانی کو پراسیکیوٹر مقرر کر دیا گیا ہے۔ مزید برآں، نئی عدالت کے لیے اسٹاف کی تعیناتی آج مکمل کی جائے گی۔

حکام کا کہنا ہے کہ نئی عدالت رواں ہفتے کے دوران دو روز میں باقاعدہ طور پر فعال ہو جائے گی، اور راولپنڈی ڈویژن بھر میں درج تمام اے این ایف کیسز کا ٹرائل اسی عدالت میں کیا جائے گا، جس سے مقدمات کی سماعت میں تیزی آئے گی اور عدالتی نظام میں سہولت بڑھے گی۔