دنیائے کرکٹ کا نیا چیمپئن کون بنے گا، بھارت یا آسٹریلیا؟ فائنل میچ آج احمد آباد کے نریندر مودی اسٹیڈیم میں ہوگا۔دونوں ٹیموں کے بڑے ناموں کے ساتھ، شائقین فائنل میں زبردست کرکٹ ایکشن کی توقع کر رہے ہیں۔میچ، میوزک اور موج مستی ساتھ ساتھ چلیں گے، میچ سے پہلے ایئر شو، وقفے وقفے سے میوزک اور لیزر لائٹس اور اختتام پر آتش بازی۔
دوسری جانب پاکستانی فاسٹ بولر محمد عامر نے نجی ٹی وی سے گفتگو کرتے ہوئے بھارت کو فائنل میں فیورٹ قرار دے دیا۔ سابق کرکٹر عبدالرزاق نے کہا کہ فیورٹ بھارت ہے، فائنل میں ٹاس بہت ضروری ہے۔کرکٹر عماد وسیم نے کہا کہ بھارت کوٹاس جیت کر بیٹنگ کرنی چاہیے، بھارت کو آتے ہی اٹیک کرنا ہے اور 350 پلس بنانا ہے۔
فائنل میں پچ کیسی ہو گی ؟
واضح رہے کہ آج کے میچ کی پچ 14 اکتوبر کو پاکستان اور بھارت کے درمیان ہونے والے میچ کی سلو پچ ہوگی۔پچ کیوریٹر نے بھارتی میڈیا کو بتایا کہ پہلے بیٹنگ کرنے والی ٹیم کا بہترین اسکور 315 تک ہوسکتا ہے جو کہ قابل دفاع اسکور ہوگا کیونکہ بعد میں بیٹنگ کرنے والی ٹیم کو مشکل پیش آئے گی۔
