اردو ورلڈ کینیڈا ( ویب نیوز ) فیصل آباد کے علاقے ملک پور میں کیمیکل فیکٹری میں ہونے والے ہولناک دھماکے نے پورے علاقے کو لرزا دیا۔
اب تک جاں بحق افراد کی تعداد 15 تک پہنچ گئی ہے ۔ دھماکا اتنا شدید تھا کہ فیکٹری مکمل طور پر زمین بوس ہوگئی اور اس میں آگ بھڑک اٹھی، جبکہ آس پاس کے گھروں کی چھتیں بھی گر گئیں۔
ریسکیو حکام کے مطابق واقعے کی اطلاع ملتے ہی امدادی کارروائیاں شروع کر دی گئیں۔ اب تک 14 افراد کی نعشیں ملبے سے نکالی جاچکی ہیں جبکہ ایک شدید زخمی شخص اسپتال میں زخموں کی تاب نہ لاتے ہوئے چل بسا۔ ریسکیو ٹیموں نے 7 زخمیوں کو اسپتال منتقل کیا ہے جہاں انہیں طبی امداد دی جا رہی ہے۔
ریسکیو ٹیموں کے مطابق، فیکٹری اور قریبی گھروں کے ملبے میں مزید افراد کے دبے ہونے کا خدشہ ہے، جس کے باعث بھاری مشینری کی مدد سے ملبہ ہٹانے کا کام جاری ہے۔کمشنر فیصل آباد نے بتایا کہ ابتدائی تحقیقات کے مطابق دھماکا گیس پائپ لائن پھٹنے کے نتیجے میں ہوا۔ ملک پور میں چار فیکٹریاں آپس میں منسلک ہو کر کام کر رہی تھیں**، جس کے باعث دھماکے کا اثر زیادہ دور تک پھیلا اور **زیادہ جانی نقصان ملحقہ گھروں کے رہائشیوں کا ہوا۔کمشنر نے مزید بتایا کہ واقعے کی مکمل تحقیقات کے لیے 5 رکنی کمیٹی قائم کی جارہی ہے، جو دھماکے کی اصل وجوہات، حفاظتی اقدامات کی صورتحال اور ذمہ داری کا تعین کرے گی۔علاقے میں سوگ کی فضا ہے جبکہ ریسکیو ٹیمیں مزید لوگوں کی تلاش میں مسلسل مصروف ہیں۔
