اردوورلڈ کینیڈا ( ویب نیوز)آئی جی پنجاب ڈاکٹر عثمان انور نے کہا ہے کہ زمان پارک میں آپریشن نہیں ہو رہا، عدالتی حکم پر عملدرآمد ہو رہا ہے، طوفان بدتمیزی نہ رکا تو گرفتاریاں کی جائیں گی۔
آئی جی پنجاب ڈاکٹر عثمان انور نے کہا ہے کہ زمان پارک لاہور میں پی ٹی آئی رہنماؤں کی جانب سے پتھراؤ کیا گیا، پٹرول بم پھینکے گئے، پولیس کی گاڑیوں کو آگ لگائی گئی، ڈی آئی جی بھی زخمی ہوئے۔
انہوں نے کہا کہ پولیس غیر مسلح ہے لیکن پتھراؤ ہو رہا ہے، رکاوٹ ہٹائیں گے اور عدالتی حکم پر عملدرآمد کو یقینی بنائیں گے۔
ڈاکٹر عثمان انور نے کہا کہ پولیس پوری طرح تیار ہے، مزید نفری کو بلایا گیا ہے، عدالتی حکم پر عمل درآمد کرانا ہے، ہم کم سے کم نقصان کے ساتھ کارروائی کرنا چاہتے ہیں، بدتمیزی جاری رہی تو گرفتاریاں ہوں گی اور قانونی کارروائی ہوگی۔
آئی جی پنجاب نے کہا کہ ہم رکاوٹ کو ہٹا کر عدالتی حکم پر عملدرآمد کو یقینی بنائیں گے، پولیس کی گاڑیوں کو آگ لگانا دہشت گردی کا مقدمہ ہے، عدالتی حکم پر کسی مخصوص شخص کے لیے عمل درآمد نہ ہوا تو یہ دہشت گردی کا مقدمہ ہوگا۔ سسٹم پر سوالیہ نشان ہے۔
انہوں نے کہا کہ بغیر کسی کارروائی کے ہم عدالتی حکم پر عمل درآمد کرانے کی کوشش کر رہے ہیں، پولیس کے پاس ویڈیوز اور تصاویر موجود ہیں، رکاوٹیں ڈالنے والوں کے خلاف کارروائی ہوگی، ہم کسی کو غیر ضروری طور پر ہراساں نہیں کرنا چاہتے،
آئی جی پنجاب نے کہا کہ والدین سے درخواست ہے کہ وہ اپنے بچوں کو سمجھائیں کہ یہ ایک عدالتی عمل ہے، نوجوانوں کو بھی سمجھائیں کہ اگر قانونی نظام میں رکاوٹیں ڈالیں گے تو قانون اپنا راستہ اختیار کرے گا۔
