اردوورلڈ کینیڈا ( ویب نیوز )پاکستان تحریک انصاف (پی ٹی آئی) کے چیئرمین اور سابق وزیراعظم عمران خان کی رہائش گاہ زمان پارک کے باہر قائم تجاوزات کے خاتمے کے لیے آپریشن مکمل کر لیا گیا ہے۔

زمان پارک کے باہر تجاوزات ہٹانے کا آپریشن گزشتہ روز شروع کیا گیا تھا، آپریشن میں لاہور ڈویلپمنٹ اتھارٹی (ایل ڈی اے) ٹاؤن آفس کی گاڑیوں اور عملے نے حصہ لیا۔
آپریشن کے دوران ضلعی انتظامیہ کی جانب سے بھاری مشینری کی مدد سے کنٹینرز اور دیگر رکاوٹیں ہٹا دی گئی ہیں۔
واضح رہے کہ گزشتہ روز نگراں وزیراعلیٰ پنجاب محسن نقوی نے تجاوزات ختم کرنے کی ہدایت کی تھی اور یہ آپریشن زمان پارک انتظامیہ کی درخواست پر کیا گیا تھا۔
دوسری جانب تجاوزات آپریشن مکمل ہونے پر دھرم پورہ پل سے مال روڈ اور جیل روڈ تک ٹریفک کو کھول دیا گیا ہے۔