اردوورلڈکینیڈا( ویب نیوز) سیکورٹی فورسز کی مؤثر کارروائیوں نے دہشت گردوں کے نیٹ ورکس کو شدید نقصان پہنچایا ہے، جس کے نتیجے میں دہشت گردی کی سرگرمیوں میں نمایاں کمی آئی ہے۔ پاک فوج کے عزم، قربانیوں اور پیشہ ورانہ مہارت کے باعث ملک بھر میں دہشت گردوں کے عزائم ناکام ہو رہے ہیں۔

تحقیقی ادارے پاکستان انسٹیٹیوٹ فار کانفلکٹ اینڈ سیکیورٹی اسٹڈیز (PICSS) کی تازہ رپورٹ کے مطابق اکتوبر 2025 میں دہشت گرد گروہوں کو گزشتہ ایک دہائی کی سب سے بڑی ناکامی کا سامنا کرنا پڑا۔ رپورٹ میں بتایا گیا ہے کہ اگست کے مقابلے میں ستمبر میں دہشت گرد حملوں کی شرح میں 52 فیصد کمی ریکارڈ کی گئی، جب کہ اکتوبر میں 355 دہشت گرد مارے گئے۔ ان کارروائیوں میں 72 سیکیورٹی اہلکار اور 31 شہری نے بھی جانوں کا نذرانہ پیش کیا۔

ادارے کے مطابق اکتوبر کے دوران دہشت گردی کے واقعات میں مجموعی جانی نقصان میں 19 فیصد کمی دیکھی گئی، جو انسدادِ دہشت گردی کے لیے جاری آپریشنز کی کامیابی کا ثبوت ہے۔

انٹیلی جنس بنیاد پر کی جانے والی بروقت کارروائیوں نے ملک میں امن و استحکام کو مزید مضبوط بنایا ہے، جب کہ دہشت گردوں کی صلاحیت اور تنظیمی ڈھانچے کو شدید دھچکا پہنچا ہے۔