اردوورلڈکینیڈا( ویب نیوز)اسلام آباد کی ڈسٹرکٹ اینڈ سیشن عدالت نے ہدایت دی ہے کہ آئندہ سماعت پر بانی پاکستان تحریکِ انصاف عمران خان کو یا تو عدالت میں پیش کیا جائے یا ویڈیو لنک کے ذریعے پیشی یقینی بنائی جائے۔

ایڈیشنل ڈسٹرکٹ اینڈ سیشن جج محمد افضل مجوکہ نے عمران خان اور ان کی اہلیہ بشریٰ بی بی کے خلاف 9 مئی اور دیگر پانچ مقدمات کی سماعت کی۔

اڈیالہ جیل انتظامیہ کی جانب سے عدالت کے شوکاز نوٹس کا جواب جمع نہ کرانے پر عدالت نے برہمی کا اظہار کیا۔

عدالت نے عمران خان اور بشریٰ بی بی کی عبوری ضمانتوں میں 25 نومبر تک توسیع کرتے ہوئے سماعت ملتوی کر دی۔

واضح رہے کہ عمران خان پر 9 مئی واقعات، اقدامِ قتل اور جعلی رسیدوں سمیت کئی مقدمات درج ہیں، جبکہ بشریٰ بی بی پر مبینہ طور پر جعلی رسیدیں جمع کرانے کا الزام عائد کیا گیا ہے۔