اردوورلڈ کینیڈا( ویب نیوز)اسلام آباد کی انسداد دہشت گردی کی عدالت نے پی ٹی آئی کے ارکان قومی اسمبلی کی تمام مقدمات میں ضمانت منظور کرتے ہوئے ان کی فوری رہائی کا حکم دے دیا۔
اسلام آباد کی انسداد دہشت گردی عدالت کے جج ابوالحسنات محمد ذوالقرنین نے تھانہ سنگجانی میں گرفتار پی ٹی آئی ایم این اے کے خلاف درج مقدمے میں بعد از گرفتاری ضمانت کی درخواستوں پر سماعت کی۔
سماعت کے دوران پراسیکیوٹر راجہ نوید نے کہا کہ مقدمے میں ایم این اے احمد چٹھہ نامزد ہیں، مقدمے میں جو دفعات لگائی گئی ہیں ان میں کم از کم تین سال کی سزا ہے، ضمانت نہیں ہونی چاہیے۔
جج ابوالحسنات محمد ذوالقرنین نے استفسار کیا کہ کیا شیر افضل مروت، احمد چٹھہ اور دیگر ایم این ایز سے کچھ برآمد ہوا ہے جس پر پراسیکیوٹر نے جواب دیا کہ نہیں، کچھ برآمد نہیں ہوا۔
بعد ازاں عدالت نے تمام مقدمات میں گرفتار پی ٹی آئی کے گرفتار ایم این ایز کی 30 ہزار روپے کی بعد از گرفتاری ضمانت منظور کرتے ہوئے فوری رہا کرنے کا حکم دیا۔
گرفتار پی ٹی آئی ایم این ایز میں شیر افضل مروت، شیخ وقاص، زین قریشی، احمد چٹھہ، عامر ڈوگر، یوسف خان، نعیم علی شاہ اور دیگر شامل ہیں۔
