اردو ورلڈکینیڈا ( ویب نیوز)پاکستان بار کونسل نے پنجاب اور خیبرپختونخوا میں انتخابات کے ازخود نوٹس کے معاملے میں 9 رکنی بینچ کی تشکیل پر بھی تحفظات کا اظہار کیا۔

نجی ٹی وی سے بات کرتے ہوئے وائس چیئرمین پاکستان بار کونسل ایڈووکیٹ ہارون رشید کا کہنا تھا کہ فل کورٹ بنتی تو بہتر ہوتا لیکن اگر فل کورٹ نہ بھی بنتی تو کم از کم دو ججوں کو شامل نہیں کرنا چاہیے تھا۔

انہوں نے کہا کہ دونوں ججز کے خلاف بھی اعتراضات اٹھائے گئے تھے، دوسری جانب دونوں ججز نے غلام محمود ڈوگر کیس میں بھی اپنے ذہن کو سامنے لاتے ہوئے الیکشن کمیشن کو الیکشن کی ذمہ داری قرار دیا ہے۔

انہوں نے کہا کہ نوٹس میں فریق بننے کا فیصلہ مشاورت کے بعد کیا جائے گا۔ چیئرمین ایگزیکٹو کمیٹی حسن رضا پاشا نے کہا کہ اعتراضات سے بچنے کے لیے بہتر تھا کہ سینئر 9 ججز کو شامل کیا جائے۔ انہوں نے کہا کہ ہماری کوشش ہے کہ سیاسی معاملات میں فریق نہ لیا جائے، سیاسی مقدمات میں بنچوں کی تشکیل میں جانبداری نہیں ہونی چاہیے۔