اردوورلڈ کینیڈا(ویب نیوز)حکومت پاکستان نے پاکستان اور بھارت کے درمیان شیڈول کے مطابق میچ کھیلنے کی اجازت دے دی ہے۔ آئی سی سی مینز ٹی 20 ورلڈ کپ میں یہ پاک بھارت مقابلہ 15 فروری 2026 کو ہوگا۔
سوشل میڈیا پر جاری بیان میں بتایا گیا کہ وزیر اعظم شہباز شریف کو پاکستان کرکٹ بورڈ کے چیئرمین محسن نقوی نے اعلیٰ سطحی مذاکرات کے نتائج سے آگاہ کیا، جو پی سی بی، آئی سی سی اور بی سی بی کے نمائندوں کے درمیان ہوئے۔ حکومت نے بنگلہ دیش کرکٹ بورڈ کی جانب سے کی گئی باضابطہ درخواست کے علاوہ سری لنکا، متحدہ عرب امارات اور دیگر رکن ممالک سے بھی مشاورت کی۔
حکومت نے بنگلہ دیش کرکٹ بورڈ کے صدر امین الاسلام کے مثبت ردعمل کا خیرمقدم کیا اور اس بات کو دہرایا کہ پاکستان ہمیشہ برادر ممالک کے ساتھ تعاون کے لیے تیار ہے۔ کثیر الجہتی مشاورت کے بعد فیصلہ کیا گیا کہ پاکستان کی قومی کرکٹ ٹیم 15 فروری 2026 کو اپنے شیڈول کے مطابق میدان میں اتریں۔
یہ فیصلہ نہ صرف کرکٹ کے جذبے اور کھیل کی روح کے تحفظ کے لیے لیا گیا بلکہ عالمی سطح پر کھیل کے تسلسل اور اس میں شریک تمام ممالک کے مفاد میں بھی ہے۔ وزیراعظم اور پاکستانی عوام نے "مین ان گرین” کے لیے نیک خواہشات کا اظہار کیا اور یقین ظاہر کیا کہ ٹیم کھیل کے جذبے اور قومی فخر کے ساتھ عالمی سطح پر پاکستان کی شان بڑھائے گی۔
