اردو ورلڈ کینیڈا ( ویب نیوز )نیپال میں حکام کے مطابق پوکھارا ایئرپورٹ پر ایک طیارہ گر کر تباہ ہو گیا ہے جس میں 72 مسافر سوار تھے۔
نیپال کی سول ایوی ایشن اتھارٹی کے ترجمان کے مطابق حادثے کے بعد سے 40 لاشیں نکالی جا چکی ہیں۔
Yeti Airlines کی پرواز کھٹمنڈو سے پوکھرا جا رہی تھی کہ لینڈنگ کے دوران گر کر تباہ ہو گئی۔
ترجمان جگناتھ نیرولا کے مطابق جہاز میں عملے کے چار ارکان 53 نیپالی اور پانچ ہندوستانی شہری تھے۔
اس کے علاوہ روس سے چار، کوریا سے دو، آئرلینڈ، آسٹریلیا، ارجنٹائن اور فرانس سے ایک ایک مسافر سوار تھا۔
نیپالی فوج اس وقت جائے حادثہ پر امدادی کارروائیوں میں مصروف ہے۔
خبر رساں ادارے سے بات کرتے ہوئے نیپالی فوج کے ایک ترجمان نے کہا کہ "اب مزید لاشوں کو ملبے سے نکالا جائے گا”
وزیر اعظم پشپا کمل نے کابینہ کی ہنگامی میٹنگ بلائی ہے اور ریاستی اداروں سے آپریشن میں مدد کرنے کو کہا ہے۔
سوشل میڈیا پر وائرل ہونے والی ویڈیوز میں جائے حادثہ سے دھواں اٹھتا دیکھا جا سکتا ہے۔
نیپالی فوج کے ترجمان اسسٹنٹ راتھی کرشنا پرساد بھنڈاری نے بتایا کہ طیارہ پوکھرا ہوائی اڈے سے ڈیڑھ کلومیٹر دور سیتی ندی کی گھاٹی میں گر کر تباہ ہوا۔
ان کے مطابق ریسکیو کے لیے 120 رینجرز اور 200 فوجی جائے حادثہ پر تعینات کیے گئے ہیں۔
