اردو ورلڈ کینیڈا ( ویب نیوز)وفاقی وزیر داخلہ رانا ثناء اللہ نے کہا ہے کہ صدر عارف علوی کے خلاف مواخذے کی تحریک پیش کی جا سکتی ہے۔

نجی ٹی وی  سے گفتگو میں رانا ثناء اللہ نے کہا کہ صدر کے مواخذے کا فیصلہ اتحادی حکومت کے پارٹی سربراہ کریں گے۔

انہوں نے کہا کہ الیکشن آئینی تقاضا ہے، صدر وزیراعظم کی رائے کا پابند ہوتا ہے، صدر کا ہر عمل وزیراعظم کی مشاورت سے جڑا ہوتا ہے۔

انہوں نے کہا کہ ملک کے صدر نے غیر آئینی قدم اٹھا کر خود کو عمران خان کا مرید ثابت کیا۔

رانا ثناء اللہ نے کہا کہ صدر مملکت نے غیر قانونی اور غیر آئینی فعل کیا ہے۔ اس سے قبل بھی آرمی چیف  کی اپوائنٹمنٹ پروفائل لے کر لاہور فرار ہو گئے تھے۔ لاہور جا کر عمران خان سے مشورہ کرنا اس عہدے کے لائق نہیں تھا۔ یہ بہت افسوسناک ہے۔

یاد رہے کہ صدر مملکت عارف علوی نے آئین کے سیکشن 57 اے کے تحت 9 اپریل کو پنجاب اور خیبرپختونخوا میں انتخابات کی تاریخ کا اعلان کیا ہے۔وفاقی حکومت نے اسے آئین کے منافی قرار دیا۔